దుబాయ్ ఎయిర్ షోపై అమెరికా పైలట్ ఆగ్రహం.. భారత పైలట్‌కు నివాళిగా ప్రదర్శన రద్దు

దుబాయ్ ఎయిర్ షో 2025లో భారత వైమానిక దళానికి (ఐఏఎఫ్) చెందిన పైలట్ మరణించినప్పటికీ, నిర్వాహకులు ప్రదర్శనను కొనసాగించడంపై అమెరికా ఎయిర్‌ఫోర్స్ (యూఎస్ఏఎఫ్) పైలట్, మేజర్ టేలర్ 'ఫెమా' హిస్టర్ తీవ్ర విస్మయం వ్యక్తం చేశారు. మృతి చెందిన పైలట్‌కు, ఆయన కుటుంబానికి గౌరవ సూచకంగా తన బృందం ప్రదర్శనను రద్దు చేసుకుంటున్నట్లు ప్రకటించారు.

గత శుక్రవారం దుబాయ్‌లోని అల్ మక్తూమ్ అంతర్జాతీయ విమానాశ్రయంలో విన్యాసాలు చేస్తుండగా హిందుస్థాన్ ఏరోనాటిక్స్ లిమిటెడ్ (హెచ్ఏఎల్) దేశీయంగా నిర్మించిన తేజస్ యుద్ధ విమానం కుప్పకూలింది. ఈ ప్రమాదంలో వింగ్ కమాండర్ నమన్ష్ శ్యాల్ దుర్మరణం పాలయ్యారు.  

ఈ విషాదం తర్వాత కూడా షో కొనసాగాలని నిర్వాహకులు నిర్ణయించడం తనను షాక్‌కు గురిచేసిందని హిస్టర్ తన ఇన్‌స్టాగ్రామ్ పోస్టులో పేర్కొన్నారు. "ప్రమాదం జరిగిన గంట, రెండు గంటల తర్వాత నేను షో జరుగుతున్న ప్రదేశానికి వెళ్లాను. అక్కడ అంతా ఖాళీగా, నిశ్శబ్దంగా ఉంటుందని భావించాను. కానీ అలా లేదు" అని ఆయన ఆవేదన వ్యక్తం చేశారు. ప్రమాదం జరిగినప్పటికీ అనౌన్సర్ ఉత్సాహంగా మాట్లాడటం, ప్రేక్షకులు తర్వాతి ప్రదర్శనలను ఆసక్తిగా చూడటం తనకు అసౌకర్యంగా అనిపించిందని ఆయన వివరించారు.

ఇదిలా ఉండగా వింగ్ కమాండర్ శ్యాల్ భౌతికకాయాన్ని ఆదివారం తమిళనాడులోని సూలూరు ఎయిర్‌బేస్‌కు తరలించారు. అక్కడ సైనిక లాంఛనాలతో నివాళులర్పించారు. అనంతరం ఆయన స్వస్థలమైన హిమాచల్ ప్రదేశ్‌లోని కాంగ్రా జిల్లా పటియాల్కర్ గ్రామానికి తరలించారు. ఆయన భార్య, వింగ్ కమాండర్ అఫ్షన్, ఆరేళ్ల కుమార్తెతో కలిసి కన్నీటిపర్యంతమవుతూ తన భర్తకు చివరిసారిగా సెల్యూట్ చేశారు. సైనిక లాంఛనాలు, గన్ సెల్యూట్ మధ్య శ్యాల్ అంత్యక్రియలు ముగిశాయి.